Öfgar...

Þarf maður að fara að búa sig undir aðra helför? Fitubollum safnað saman og heimurinn bara losaður við þær!

Ansi held ég að það yrði fátæklegt á jörðinni þá.

Ekki orðum á þetta eyðandi...

Bollurnar borgi eða grenni sig

Skrítin vinnubrögð

Ef það væri nú hægt að ganga svona hratt til verks í öllum málum af þessu tagi.

Ég þekki konu sem fór úr landi með þeim skilyrðum að hún fengi að koma aftur eftir 3 mánuði. Síðan eru liðnir nærri 9 mánuðir og engin lausn enn í sjónmáli. Það er engin svör hægt að fá nokkursstaðar nema þau að allir séu í sumarfríi og því ekki hægt að fjalla um málið. Það þarf enginn að segja mér að fólkið sé búið að vera í sumarfríi síðan í byrjun desember. Vinir konunnar og aðstandendur tala fyrir daufum eyrum áhugalausra embættismanna sem taka engum sönsum.

Þessi kona kom hingað í von um betra líf en uppskar einungis ofbeldi af verstu sort. Hún var svelt og svívirt, hirt af henni hver einasta króna sem hún vann sér inn og henni haldið í heljargreipum af vondum manni sem bjó svo um hnútana að hún yrði rekin úr landi á endanum. Það vill henni kannski til happs að hún á nú fólk að á Íslandi sem er tilbúið til að berjast fyrir því að hún fái að koma hingað aftur, koma til að vera.

Það er mín skoðun að endurskoða þurfi algjörlega öll vinnubrögð og vinnuferla sem viðhafðir eru í svona málum og að sérstaka áherslu þurfi að leggja á að jafnræðis sé gætt. Það er ekki beint sanngjarnt að fólk sem beðið hefur mánuðum saman eftir að mál þess komist til umfjöllunar sé sett á hakann vegna einhverra annarra mála sem vakið hafa athygli fjölmiðla.

Með þessum orðum mínum er ég alls ekki að setja út á það að þessum manni sé veitt hæli og mál hans tekið fyrir með sanngjörnum hætti. Persónulega þótti mér þetta hneisa hvernig komið var fram við manninn og fjölskyldu hans. Mér þykir þó súrt í broti að sjá með svo afgerandi hætti hvað „sanngirni“ og „réttlæti“ virðast vera orðin pólitísk orð.

Lögmaður Ramsesar þakkar ráðherra

The Hoff

Mig langaði bara að deila þessu með ykkur...

http://www.davidhasselhoff.com/  

Persónulegi bloggarinn...

Fólki þykir almennt orðið voða hallærislegt þegar bloggarar blogga ekki um stjórn- og efnahagsmál eða það sem brennur á landanum hverju sinni... en mér er nákvæmlega sama. Það er nóg af fíflum að segja sína skoðun á svoleiðis hlutum.

Sei sei já. Er þá hversdagurinn að taka við eftir ansi viðburðaríkt sumar? ... og þó, ekki alveg strax.

Hvernig stendur á því að maður kemst ekki upp með að vera gamall og leiðinlegur á sumrin? Ég nota þessa afsökun óspart á veturna þegar ég nenni ekki út á lífið - þá er ég gömul og leiðinleg. Þetta er bara ekki hægt á sumrin. Þá eru það starfsmannapartýin (jafnvel með mörgum settum af samstarfsfólki), kvenfélagsferðirnar, afmælin, ættarmótin, útilegurnar, já og bara tilefnislausi sumarfílingurinn sem grípur fólk með minnsta fyrirvara.

Með vorinu verður maður kannski viljugri.

Sumarbústaðarferðin með „pakkinu af vellinum“ er nú á topp-fimm listanum yfir það skemmtilegasta við sumarið 2008. Ég náði að sólbrenna á hnjánum í pottinum og við Svanhvít náðum auðvitað að æra eiginmennin með skemmtilegheitum sem og blíðka þá með kurteisi og prúðri framkomu. Hmm, skyndilega er eins og ég hafi fengið ryk í hálsinn... hehemm höhöhömmm... en látum það liggja á milli hluta. Við fórum að sjá Gullfoss og Geysi, það var ansi skemmtilegt - þó ekki frá móðurlegu sjónarmiði. Það kom fyrir að orðin „PASSAÐU BARNIГ voru görguð með nokkrum tryllingi. Gullfoss og Geysir sáu sér svo líka fært að koma og heimsækja okkur í bústaðinn... a.m.k. annar þeirra.

Við vorum líka svo lánsöm að fá að prófa bílaverkstæði í ferðalaginu, eitt í Búðardal og annað á Akranesi. Ólíkt meira mannlíf var nú í Búðardal en á Akranesi - hvað sem fólki finnst um það. Í Búðardal voru líka keypt bílveikilyf í minnsta apóteki sem ég hef séð - trúlega ekki mikið stærra en fataskápurinn í svefnherberginu mínu. Þegar ég sá svo afgreiðslukonuna datt mér helst í hug að ráðið hefði verið í stöðuna eftir stærð...

Langi Mangi heitinn var svo á síðustu helgi kvaddur með kurt og pí og djammaður í gröfina. Mikið óskaplega á ég eftir að sakna hans. Ég get með sanni sagt að Langi Mangi bjargaði geðheilsu minni, en það var eitt það stærsta og hrikalegasta skref sem ég hef tekið, að biðja um vinnu þar. Ég var búin að vera þunglynd og leiðinleg og innilokuð með veikt barn, án mikilla mannlegra samskipta þegar ég loks reif mig upp á rassgatinu og sótti um vinnu á bar. Hreinlega þvingaði sjálfa mig til að fara út úr húsi og hitta fólk - og það breytti öllu. Ég hætti að vera í fýlu og eignaðist fullt af nýjum vinum og kunningjum, gerði hluti sem ég hafði aldrei þorað (eins og að syngja opinberlega eitthvað annað en skólalögin) og á eftir að búa að því það sem eftir er.

En eitt tekur við af öðru og á næstu helgi verður auðvitað sungið og dillað sér í góðra vina hópi úti í sveit - sei nó mor... Svo er það Glasgow í lok ágúst með 17 hressum kerlum! Alltaf nóg að gera.

Ætli ég láti þetta ekki gott heita - ekki að nenna þessu...

Af masókisma og sangríu...

Jæja, þá er helgarfríið framundan. Ég veit reyndar ekki hversu mikið frí það verður því ástkært vinkonuviðrini mitt er í heimsókn ásamt öllu sínu slekti.

Helgarnar með henni byrja yfirleitt á því að ég fer löðursveitt eftir gestaþjónustu og illa til fara út á lífið á fimmtudagskvöldi þar sem hver bjórinn á fætur öðrum er rekinn ofan í mig. Þegar ég segi „rekinn“, þá meina ég „rekinn“... Ef ég voga mér að dragast svo mikið sem einn sopa afturúr þá er mér vinsamlega (með þrýstingi þó) bent á það og látunum er ekki linnt fyrr en ég hef náð að jafna. Svona var þetta í gærkvöldi, en sökum ótrúlegrar kænsku minnar og snilli í undanbrögðum tókst mér að komast upp með að drekka einum bjór færra en vinkonan. Svo mætti ég auðvitað illa sofin og úldin í vinnu í morgun á meðan gestirnir sváfu út!

Föstudagskvöldunum er svo gjarnan eytt í að tapa í spilum, því það getur ekki nokkur lifandi maður unnið frú Svanhvíti Bonaparte í spilum. Hún spilar rommý af sömu herkænsku og Alexander mikli lagði allt undir sig hérna í den! Útsmogin og undirförul eins og Kobbi kviðrista! Útsjónarsöm eins og Sérlokkur Hólmur...! En jæja, ég bíð spennt eftir að láta bursta mig og niðurlægja í kvöld. Masókismi á hæsta stigi.

Laugardagarnir eru yfirleitt ágætir framanaf en svo tekur alltaf við einhver hryllingur sem veldur þreytu og veikindum það sem eftir er helgar, og þannig verður það auðvitað á morgun! En þegar líða fer á laugardagskvöldið munu taka við misþyrmingar af verstu sort! Það verður Costa del Sol þemapartý (ég legg fæð á þemapartý) hvar ég verð eflaust neydd til að drekka sangríu og hlusta á ógeðslega teknó-tónlist! Samt hlakka ég voða mikið til - masókismi...

Hafið það gott um helgina og hugsið til mín í þjáningum mínum.

Ég er farin í helgarfrí!

Blessað góðærið...

Góðærið var ekkert annað en offramboð af lánsmöguleikum til að kaupa drasl sem nú er verðlaust.

Og hananú!

Kvíða kreppu og finnst allt hækka nema launin

Hjúkk...

Ég get nú ekki sagt annað en að ég hafi verið fegin þegar ég sá fréttina leiðrétta og sá að fyrirsögnin hafði ekki breyst. 3 ár eru ekki mikið, en 3 mánuðir, eins og sagði í fréttinni fyrst, hefðu verið svo miklu meira en skammarleg mistök, þó e.t.v. toppi fátt mistökin sem urðu í héraði í fyrra skiptið.

Við fyrsta lestur datt mér hinsvegar ekki annað í hug en að fyrirsögnin hefði verið röng og maðurinn fengið 3ja mánaða fangelsi - svo litla trú hef ég á dómskerfinu þegar kemur að kynferðisafbrotum.

Það fæst ekki mikið af efnislegum gæðum fyrir eina og hálfa milljón í dag, en aldrei hefur ein og hálf milljón dugað fyrir sáluhjálp.

3 ára fangelsi fyrir nauðgun

„Pirrandi“ neytendur...

Algjörlega sammála. Þetta er meira en óþolandi!

Alveg þykir mér ótrúlega merkilegt þegar vörubretti eru sett út á mitt gólf í verslunum, nú eða hálfupprifnir kassar, og ekkert verðmerkt. Ég er fyrir löngu hætt að freistast til þess að kaupa þessar vörur.

T.d. í gær var ég í matvöruverslun og í biðröðinni að kassanum sé ég mjög flottar og sniðugar pizzaplötur, einmitt í hálfupprifnum kassa, hent upp á annan kassa með sælgæti í - allt óverðmerkt. Það er ekki nokkur spurning að ég hefði keypt mér svona plötu ef verðið hefði verið sýnilegt, en þarna varð verslunin af viðskiptum vegna slakra vinnubragða.

Ég er líka ein af þessum „pirrandi“ viðskiptavinum sem legg á minnið verð á vörum sem eru á tilboði og geri athugasemdir við kassann. Fyrir ekki svo löngu gerði ég athugasemd við verð á papriku. Paprikan var pökkuð og auglýst á tilboði kr. 179 fyrir pakkann. Þegar ég kom á kassann var hún hinsvegar á kr. 199, eða 20 kr. dýrari en auglýst var. Ég sagði auðvitað við afgreiðslustúlkuna að ég vildi fá þessa papriku á auglýstu verði, en hún hreytti í mig „ÞAÐ ER BARA EKKERT HÆGT“. Ég sagði að henni bæri skylda til að selja mér þetta á uppsettu verði, „ÞAÐ ER BARA SVONA, ÞAÐ ER EKKERT HÆGT“ skammaðist hún þá á móti. Ég var alveg við það að verða fjúkandi reið þegar yfirmaður hennar kom og breytti þessu - að sjálfsögðu var það hægt!

Þarna var ég að kaupa 2 pakka af papriku og verslunin ætlaði að rukka mig um 40 kr. meira en ég átti að borga. Það er kannski ekki mikið, en á mínu heimili eru borðaðir ca. 2 pakkar af papriku á viku, og hefði ég keypt 2 pakka af papriku í hverri viku í heilt ár, á 40 kr. meira en auglýst var, hefðu þetta gert 2080 kr. yfir árið - það eru bara 26 lítrar af mjólk! Nú eða 11 pakkar af papriku!

Ég held að ég sé ekki smásmuguleg, bara meðvitaður neytandi, eins og neytendur eiga að vera.

 

Vill nefna verslanir sem verðmerkja ekki

Skjálfti... hérna?!? Á Ísafirði?!?!

Þetta var ansi merkilegt!

Allt í einu fór mig að svima og fannst allt snúast, en þá var það bara jörðin að skjálfa undir mér. Málverkin á veggnum og gardínurnar fóru svo að slást til og gerðu það í nokkrar sekúndur.

Þetta hlýtur að hafa verið ansi öflugur skjálfti fyrst hann fannst svona greinilega hérna.

Afar öflugur jarðskjálfti

Brjóstamjólkurmafían

Skyldu foreldrarnir hafa verið greindarprófaðir til að kanna erfðatengsl góðrar greindar? Maður spyr sig. Það er jú alltaf svo að bæði erfðir og umhverfi skipta máli í svona löguðu.

Sem móðir langveiks barns hérna í denn (fyrir 7 árum), fékk ég að kynnast brjóstamjólkurmafíunni. Fólk sem segir það öllu skipta að barn fái að vera á brjósti sem allra lengst, án tillits til líðan móður.

Eftir mjaltavélar, blöðrur, blæðandi sár, stíflur, sýkingar, sveppasýkingar, mjög einhæft mataræði vegna ofnæmis hjá barninu og gífurleg vonbrigði oft á dag í rúma 5 mánuði með það að barnið mitt gæti ekki drukkið eins og brjóstamjólkurmafían sagði að hann "ætti" að gera... þá gafst ég upp og dílaði við nagandi samviskubit. Hlustaði á hluti eins og "bíddu... ertu að segja að þú ætlir að setja hann á sojamjólk eða!?!?", sprautaði þessu "gutli" í sonduna hjá honum - og skammaðist mín.

Alveg er ég viss um að einhver móðirin í brjóstamjólkurvandræðum, rekst á mafíósa sem rekur þessa grein framan í hana og segir "SKO!".

Fólk getur í alvöru verið svo brenglað.

Lengri brjóstagjöf eykur greind